மத்தியத் தொல்லியல் துறை

கரூர் தாந்தோனி வட்டாரத்தில் அமைந்துள்ள அஞ்சூர் கிராமத்தின் பரந்த நிலப்பரப்பில் கல்வட்டங்களும், குத்துக்கற்களும் மேற்பரப்பு கள ஆய்வில் கண்டறியப்பட்டு வெளிக்கொணரப்பட்டுள்ளன. அதிக எண்ணிக்கையிலான கல்வட்டங்களும், சுமார் 5-க்கும் மேற்பட்ட குத்துக்கற்கள் எனப்படும் இறந்தோர் நினைவாக நாட்டப்பட்ட வீரக்கற்களும் காணப்படுகின்றன. இந்த குத்துக்கற்களில் எழுத்தமைதியோ, உருவமைதியோ காணப்படவில்லை. ஒரு சில குத்துக்கற்கள் உடைந்த நிலையில் காட்சியளிக்கின்றன. இவ்வூர் பெருங்கற்காலப் பண்பாட்டின் தொடர்ச்சி நிலையைக் காட்டி நிற்கின்றது.

ஜெகதாபி என்ற கிராமம் கரூர் மாவட்டத்தில், தாந்தோனி வட்டாரத்தில், கரூருக்கு தெற்கே சுமார் இருபது கிலோமீட்டர் தொலைவிலுள்ள சிற்றூராகும். 50-க்கும் மேற்பட்ட கல்வட்டங்கள் இவ்விடத்தில் காணப்படுகின்றன. உள்ளூர் மக்களால் குரங்கு பட்டறை என்று இவ்விடம் அழைக்கப்படுகிறது.